Экскурсія ў філіял Дзяржаўнага Літаратурнага музея Янкі Купалы ў Ляўках
27 верасня навучэнцы нашай школы наведалі філіял Дзяржаўнага Літаратурнага музея Янкі Купалы ў Ляўках, змаглі яшчэ раз дакрануцца да жыцця і творчасці беларускага песняра, чалавека яркага таленту, шырокага творчага дару, заснавальніка нацыянальнай літаратуры.
Экскурсія вельмі спадабалася навучэнцам. Яны даведаліся, што ў эспазіцыю тэрыторыі Купалаўскага мемарыяльнага запаведніка ”Ляўкі“ ўваходзіць дача Я.Купалы, будынак былой канторы Копыскага лясніцтва, у якім зараз размешчана літаратурна-дакументальная частка экспазіцыі, домік шафёра, гараж, у якім экспаніруецца машына пісьменніка ”Шаўрале“, помнік ”Восень паэта“.
Шмат цікавага і невядомага пачулі навучэнцы падчас экскурсіі пра пісьменніка, убачылі, як беражліва захоўваецца ўсё, што звязана з жыццём і творчасцю народнага паэта Беларусі, – асабістыя рэчы, арыгіналы твораў, фотаздымкі, шматлікія дакументы; работы жывапісцаў, графікаў, скульптараў, народных умельцаў, прысвечаныя Я.Купалу.
 |
 |
Асаблівае ўражанне засталося пасля наведвання адноўленай дачы паэта, якая згарэла ў час вайны. Інтэр’еры гасцёўні, кабінета Я.Купалы далі магчымасць адчуць подых жыцця пісьменніка.
Праходзяць гады, і чым больш яны аддаляюць нас ад таго часу, у якім жыў пясняр, тым даражэйшым і больш велічным становіцца яго вобраз.
Экскурсія яшчэ раз дапамагла зразумець, што Я.Купала і сёння ідзе побач з намі, малады і натхнёны , нястомны настаўнік і мудры дарадца.
Настаўнік беларускай мовы і літаратуры Спрытула Г.М.
